«مصيف بالتقسيط»، شعار رفعه عدد من شركات السياحة في ظل غلاء الأسعار، لتشجيع المواطنين على حجز رحلاتهم المفضلة إلى مدن مرسى مطروح وشرم الشيخ والغردقة وغيرها من الأماكن السياحية، التي يتهافت عليها الجمهور في فصل الصيف، موضحة الأسعار وطرق السداد لجذب عملاء من كافة المحافظات.
مصيف بالتقسيط
منذ شهر أكتوبر الماضي، أعلنت إحدى الشركات السياحية فتح باب حجز مصيف مرسى مطروح، ونظم التقسيط دون فوائد، بأسعار تبدأ من 2000 جنيه، للشقق المطلة على البحر مباشرة: «بقالنا 12 سنة فاتحين الشركة، وبنقدم خدمة التقسيط من 10 سنين لعملائنا، وكلهم عائلات وممنوع الشباب بمفرده، لذلك سمعتنا حلوة فى السوق»، بحسب حنان عادل، مدير الحجز بالشركة.
التقسيط على مدار 6 أشهر بدون فائدة
تقول «حنان» إن أغلب العملاء يفضلون نظام التقسيط حتى لا يشعروا بالتكاليف الباهظة، موضحة أنه يكون على مدار 6 أشهر، ويتم الحجز بصورة الرقم القومي ورقم الهاتف والحصول على إيصال لضمان حقه، والاطمئنان على الشقة وموقعها ومميزاتها التي تناسبه: «بيتفق على الميعاد اللى هيروح فيه، ولو عايز يروح يشوف الشقة بنفسه بنخليه يشوفها عشان يطمن».
تتيح الشركة لكل أسرة 8 أيام و7 ليال للاستمتاع وقضاء وقت كافٍ على البحر، وفقاً لـ«حنان»: «بيحجز معانا ناس من كل المحافظات، وبنعمل حساب مسافة الطريق اللى ممكن تاخد يوم رايح ويوم جاي، مع توفير كل سبل الراحة»، مشيرة إلى أن كل عميل يطلب نظام التقسيط، عليه سداد المبلغ كاملاً قبل مجىء موعد رحلته: «ده نظامنا من زمان، عشان مش عارفين اللي هيروح يصيف ويرجع ممكن يدفع اللي عليه ولا لأ».
في ذات الوقت، تراعى «حنان» ظروف العملاء المادية، بتقديم أقل سعر وأفضل خدمة، خاصة للعملاء الذين اعتادوا حجز رحلات مع الشركة منذ 10 سنوات وأكثر: «لينا ناس بتطلع معانا من أول ما فتحنا الشركة، وأهم حاجة المصداقية»، لافتة إلى أن الشركة ترفض التعامل مع الشباب حفاظاً على خصوصية العائلات والأسر، بجانب تجنب المشكلات التى قد تحدث نتيجة «طيش» بعضهم: «فيه شباب سنه صغير وغير مسئول، وماينفعش نقعد شباب قصاد عيلة معاها بنات، عشان كده شغلنا كله مع الأسر فقط».
الحجز بفيزا المشتريات
بدأ محمد عثمان، مدير شركة تسويق إلكتروني، الترويج لعدد من شركات السياحة والفنادق المتعاقد معها، التي تطرح نظام التقسيط لعملائها عن طريق فيزا المشتريات أو أحد التطبيقات الخاصة بالسفر: «العميل بيتعامل مع البنك مباشرة ويحجز كأنه بيشترى أي منتج، وأنا ليا فلوس باخدها وهو يختار النظام اللي يعجبه أو يدخل على الأبلكيشن ويشوف العروض اللي تناسبه»، مؤكداً أنه يتعامل مع شركات تنظم رحلات إلى شرم الشيخ والغردقة، وتبدأ أسعار الفرد من ألف جنيه.
