«أنا من القاهرة وهتجوز فى الإسماعيلية، وماعرفش حد هناك، خايفة أكون لوحدى فى فرحى، ممكن تفرّحونى وتيجولى؟» منشور على أحد جروبات «فيس بوك»، طالبت فيه «ندى» أعضاء الجروب من الفتيات بحضور حفل زفافها، حيث إنها ترغب فى اكتمال فرحتها بـ«لمة» حولها تشعرها بالأصدقاء.
تحكى غدير عبدالله، القاطنة فى محافظة الإسماعيلية عن القصة المبهجة: «ندى نزّلت بوست فى جروب، وقالت إن هى هتتجوز فى الإسماعيلية، وهى أصلاً من القاهرة ومالهاش أصحاب هنا، ولأن الإسماعيلاوية جدعان، قعدنا نقول لها فى التعليقات إننا موجودين لو احتاجت أى حاجة، وعملنا جروب على واتس آب، كنا حوالى 30 بنت».
توطدت علاقة الفتيات خلال المدة التى سبقت حفل الزفاف، كما أوضحت «غدير»: «قعدنا شهر بنتكلم مع بعض ونجهز لفرح ندى، الجروب فى الأول كان معمول عشان نرتب للفرح ونجمع بعض، لكن اللى حصل إننا كوّنا صداقات، وحصل بينا تناغم خلانا نرتب للفرح قبلها بفترة ونختار الفساتين مع بعض والميكاب».
لم تصدق «ندى» فكرة حضور صديقاتها الجدد حفل زفافها، حتى تملك منها التوتر، بحسب «غدير»: «ندى خافت زى أى عروسة إنها ماتلاقيش حد جنبها فى ليلة العمر، كل شوية كانت بتأكد علينا وتقول لنا انتو جايين بجد يا جماعة! وكانت مبسوطة جداً باهتمامنا، وبعد ما شافتنا فى الفرح كانت فرحانة جداً».
من بين الفتيات اللائى اهتممن أيضاً بتفاصيل الحفل، كانت آية زويل، كما أوضحت «غدير»: «آية تحديداً راحت من بدرى عشان تظبط حاجات مع الدى جى، وتختار الأغانى اللى عاوزينها، كنا مظبطين أول فقرة على أغنية كاجولوووه، ولابسين نضارات الأغنية، وطبعاً إحنا من أول الفرح ما بدأ لحد آخره بنرقص».
نشرت «غدير» صور الزفاف بعد الحفل، وانهالت التعليقات: «كان فيه كومنتات كتير جداً، منها المبهج والحزين والكوميدى، زى فين بنات المنصورة يجمعوا هنا؟ إحنا ماعندناش كدا ليه فى طنطا.. أنا عايزة البنات الجميلة دى تيجى فرحى فى إسكندرية».