استضاف برنامج «مصر تستطيع»، المذاع على شاشة قناة «dmc»، ويقدمه الإعلامي أحمد فايق، عددا من أوائل الثانوية العامة في الدفعات السابقة لتقديمهم نصائح للطلاب وروشتة النجاح لحل 55 سؤالا في 3 ساعات بالامتحان، والحصول على مجموع كبير.
أحمد: لو مجبتش فكرة أي سؤال في 5 دقايق بسيبه
قال أحمد إبراهيم، الأول على الثانوية العامة دفعة 2021، إنه يجيب على الأسئلة بترتيبها الطبيعي، وليس من الأسهل للأصعب أو العكس: «بمشي مع أإسئلة الامتحان عادي، وبما إني عارف أن الوقت ضيق كان أي سؤال مجبتش فكرته في 5 دقايق بسيبه للآخر ومتقلقش خالص».
وتابع: «لما تخلص أسئلة الامتحان وتعرف إن فاضلك ربع ساعة على سؤالين بس هتحس إنك مطمن، وساعتها هتجيب فكرته وده حصل معايا أكتر من مرة».
عهد: القطعة بخليها للآخر
وقالت عهد مصطفى، الأولى على الثانوية العامة دفعة 2021، إنها كانت تخشى حل سؤال القطعة في امتحان اللغة الألمانية في بداية الامتحان، «لو شوفت كلمة مش عارفها هقعد الامتحان كله متوترة، فكنت أخلص سؤال الاختيار من متعدد وأسيب القطعة للآخر».
وتابعت: «نفس الكلام في امتحان اللغة العربية، كنت بحب أسيب أسئلة القطع في الآخر عشان بحب أقرأ بتريث لكن المواد العلمية زي الكيمياء والفيزياء والرياضيات بمشي بترتيب الأسئلة عادي ولو وقف قدامي حاجة بسيبها في الآخر».
وأشارت فريدة مؤمن، الأولى على الثانوية العامة في 2021، إلى أن طلاب الصف الثالث الثانوية لديهم اعتقاد خاطئ بأنهم سيغلقون هواتفهم والنوم 8 ساعات والمذاكرة باقي الساعات والتوقف عن الخروج من المنزل، كل هذه الأشياء السابقة اعتقاد خاطئ وسيؤثر على المذاكرة.
اتفرج على التلفزيون وشوف صحابك
وواصلت: «ثانوية عامة لازم تعامل كسنة زي أي سنة لازم الواحد يمارس فيها كل الحاجات اللي متعود عليها، لو حد بيلعب رياضة دي حاجة صحية إنه يستمر فيها، والموبايل عادي يبقى معاك، بس الفكرة لما تقعد قدام الكتاب لازم تركز بس فيه.. إدي كل حاجة حقها، اخرج مارس رياضة اتفرج على التلفزيون واقعد مع أهلك شوف مع أصحابك بس كمان لما تذاكر إديها حقها».
هانيا: اللي بيذاكر في الأجازة حرام عليه
وأكدت هانيا محمد، الثانية على الثانوية العامة دفعة 2019، أنها لم تبدأ المذاكرة من الإجازة ولكن من بداية العام الدراسي بشكل طبيعي، «اللي بيعمل كدة حرام عليه.. طاقتك هتضيع في نهاية السنة».