عقب نجاحه في الثانوية العامة 2022 وحصوله على مجموع عال يؤهله للالتحاق بكلية الطب البيطري وغيرها من الجامعات، وعقب اختياره كلية الطب البيطري في تنسيق المرحلة الثانية إلا أنه تراجع في اللحظة الأخيرة، وقرر تغيير مساره وعدم الالتحاق بأي كلية من كليات المجال الطبي.
أصر محمد حمدي المشرفي، 18 عاما، ابن مدينة بيلا، بمحافظة كفر الشيخ، على الالتحاق بكلية الذكاء الاصطناعي بجامعة كفر الشيخ، باعتبارها أحد الكليات الجديدة، أملاً في حجز فرصة عمل في المستقبل.
«خريجي كلية الطب البيطري بقوا كتير جدا في مصر وكلية الذكاء الاصطناعي كلية جديدة ولسه أيامها جاية، وشايف إن هيكون ليا مستقبل فيها بإذن الله».. بهذه الكلمات بدأ محمد المشرفي، حديثه لـ«»، مضيفا: «أنا نجحت في الثانوية العامة بمجموع 362 درجة، وبنسبة 88.29%، وكنت لاحق كلية طب بيطري والكليات اللي بعدها بس بالنسبة للطب البيطري مش كانت مفضلة بالنسبة ليا وكانت ذكاء اصطناعي في المقام الأول لكن منزلتش مرحلة تانية علمي علوم وبيطري كانت أفضل المتاح وقتها عشان كده قدمت فيها في الأول».
المستقبل في الذكاء الاصطناعي
وتابع: «لكن بعد ما نزل إعلان وجود أماكن في قسم البايو في ذكاء، فرحت جدا، وحولت وقدمت في القسم وأنا حابب ذكاء جدا لأن فيها مجالات كتيرة وهي المستقبل وخصوصا بعد زيارة الرئيس عبد الفتاح السيسي، رئيس الجمهورية، لجامعة كفر الشيخ في شهر ديسمبر عام 2021، وتفقده للكلية وإشادته بيها، وده كان حافز ليا إني أقدم فيها».
رأي الأسرة في قرار «محمد»
أسرة «المشرفي» لم تضغط عليه للالتحاق بأي كلية بل تركت له الحرية الكاملة في اختيار الكلية التي سيتحدد من خلالها مستقبله، يتابع: «محدش من الأسرة ضغط عليا في موضوع الالتحاق بكلية الطب البيطري أو الذكاء الاصطناعي بالعكس ده قالولي ده اختيارك ومستقبلك واستخير ربنا وخد قرارك، وبالنسبة للأصدقاء كانوا حافز كبير ليا وكانوا أكبر داعم ليا إني أقدم في ذكاء».
«كلية الذكاء الاصطناعي فيها قسمين عام وخاص، اسمه بايو وده اللي أنا مقدم فيه، لأن القسم مختص في المجال الطبي والأجهزة الطبية وتحليل الأمراض وريبوتات تغني عن الأطباء والممرضين، وياريت كنا استفادنا بالكلام ده أيام كورونا كان هيفدنا جدا بدل الرعب اللي كُنا فيه، وكُنا هنعرف نتعامل مع المصابين بدون ما نتعدي منهم أو حد يتوفى».
الفترة المقبلة للذكاء الاصطناعي
يري «المشرفي» أنه لن يندم أبدا على قراره بترك كلية الطب البيطري والالتحاق بكلية الذكاء الاصطناعي «المستقبل في الأول والآخر ده بإيد ربنا سبحانه وتعالى بس، وإن شاء الله متفائل وشايف إني مش هندم إني مدخلتش طب بيطري ودخلت ذكاء، ومتأكد إن الأيام الجاية هتبقى هي أيام الذكاء الاصطناعي وبعد كلام الرئيس السيسي، أكيد هيبقى ليها فُرص عمل في مصر وليها بردو في الخارج، وإن شاء الله ربنا يكرمنا ويوفقنا ونقدر نعلي ببلدنا كمان وكمان».
