بمشاعر صادقة وقلوب ترغب في نشر الفرحة، أطلقت مجموعة من فتيات منطقة الإمامين والتونسي بالقاهرة، مبادرة لإسعاد أطفال المنطقة والمناطق المجاورة من أبناء الأسر الفقيرة ورقيقة الحال وكذلك مجموعة من أصحاب الهمم احتفالا بقدوم عيد الفطر المبارك، حيث نظمن حفلة بها وجبات للأطفال ومشروبات ومسابقات دينية وأسئلة عامة مع جوائز مادية للفائزين ظهرت الفرحة على ملامح الأطفال المشاركين في هذا الحفل.
تقول هدى حسني إحدى مؤسسات المبادرة: هدفنا إننا نفرح أطفال الأسر اللي على قد حالهم وجمعنا مشاركات من زمايلي البنات وهن حبيبة عزام وشيماء حمصاني ورقية عبد العال وأسماء يوسف وإسراء حليم ونرمين صالح، اللي ما اترددوش لحظة إنهم يجهزوا معانا الحفلة وفقراتها بشكل حقق سعادة كبيرة للأطفال».
شيف خاص للوجبات
وتضيف حسني في تصريحات لـ«» عن الوجبات التي قاموا بتوزيعها: «اتفقنا مع شيف مخصوص يعمل وجبات سندوتشات برجر وفراخ ومعاهم بطاطس ومياه ومشروبات زي اللي بيتباعوا في المطاعم بالظبط مع الحفاظ على الجودة العالية كمحاولة مننا إننا نوفرلهم حاجة مش قادرين يشتروها ويتبسطوا بيها، وقامت إحدى المشاركات بتوفير أطباق جيلي تم توزيعها عليهم».
تنوع فقرات الحفل
وتنوعت فقرات الحفل بين مسابقات أسئلة دينية ومسابقات أسئلة عامة والفائز في كل سؤال يحصل على لعبة كمكافأة له على الإجابة.
وتقول نرمين صالح إحدى المنظمات للحفل: «فقرات المسابقات كانت ممتعة جدا للأطفال واتبسطوا بيها وبالجوايز كتير وكمان كل طفل كان بياخد عيدية 50 جنيه بالإضافة لملابس جديدة علشان يحتفل بيها في العيد ده بجانب الوجبة والألعاب وكان يوم جميل اتبسطوا فيه كلهم وأهاليهم كمان، وكنا جايبين أطفالنا معاهم علشان محدش يحس باختلاف ويحسوا إن كلنا واحد».
تابعت: «الحمد لله ربنا قدرنا ووصلنا لحوالي 100 طفل من أبناء الأسر رقيقة الحال وذوي الهمم في منطقتنا والمناطق التانية وقدنا نعيش معاهم العيد بشكل مختلف كانت أجواء كلها فرحة وسعادة لينا ولولادنا وللأطفال وإن شاء الله ما تكونش آخر مرة ونعملها كل عيد».
