سعادة غامرة اجتاحت منزل أسرة «نادر» الأهلاوية، احتفالا بعيد ميلاد الأسطورة الكروية محمود الخطيب، رئيس النادي الأهلي، الذي أمضى سنوات طويلة من النجاح سواء كلاعب أو رئيس للقلعة الحمراء، حيث قاد الفريق للتتويج بالعديد من البطولات المحلية والقارية، ما جعله يدخل قلوب جميع مشجعي المارد الأحمر.
نادر سعيد، القاطن في قرية المجد النموذجية بمركز الرحمانية في محافظة البحيرة، قرر استغلال منزله المصمم على شكل شعار النادي الأهلي، بالاحتفال بعيد ميلاد «الخطيب» الـ67، الذي يوافق اليوم السبت 30 أكتوبر، على طريقته الخاصة مع أسرته: «جبنا تورتة وبالونات للاحتفال كأنه فرد من العيلة وبنحتفل بيه».
رغبة نادر في الاحتفال بعيد ميلاد الخطيب قبل الجميع، دفعته للتفكير في التجهيز له عن طريق الاتفاق مع أحد المحال الخاصة بصناعة التورتة من أجل رسم صورة «بيبو» عليها، وفقا لما رواه صاحب الـ40 عاما لـ«»: «التجهيز ده خد يوم كامل، لغاية ما اتفقت مع الراجل وعملي التورتة، وفاجئت بيها ولادي، اللي على طول لبسوا تيشيرتات المارد الأحمر علشان نحتفل كلنا مع بعض».
«سنة حلوة يا بيبو»، بتلك الكلمات تغنى نادر وعائلته المكونة من زوجته وثلاثة أبناء، أثناء احتفالهم بعيد ميلاد الخطيب وتقطيع التورتة، وسط سعادة كبيرة رسمت على وجوههم، كما أوضح: «الخطيب ليه جماهير كتير بتحبه، وإحنا بنحبه زي حبنا للأهلي بالظبط ولما قابلته جوة النادي كان حلم بالنسبة لي ومصدقتش نفسي».
مقابلة «نادر» و«الخطيب»
وجمع لقاء بين «نادر» و«الخطيب» داخل جدران القلعة الحمراء في الأيام الماضية، بعد أن وافق الأخير على مقابلته لتحقيق أمنيته: «أنا كنت مجهز له برواز فيه صورة البيت كهدية مني ليه، واتصدم أول ما شافها من كثرة الولاء للنادي، وسط علامات من الدهشة قالي ما شاء الله ده بيتك يعني ده حقيقي، معقولة فيه حاجة بالجمال ده، ربنا يباركلك»