حزن وأسى سيطر على الشعب المصري اليوم، إثر وفاة الفنانة دلال عبدالعزيز ملكة الضحكة والابتسامة والرقة والدلال، لتأتي وفاتها بعد شهرين ونصف تقريبا، من وفاة زوجها الفنان سمير غانم، في فاجعة ومصاب أليم للجميع، وليس بنتيهما فقط إيمي ودنيا سمير غانم، إذ كانت الفنانة الراحلة دلال عبد العزيز، بمثابة الأم الحنون العطوف.
وكشفت الفنانة دلال عبد العزيز، خلال لقائها مع الفنانة إسعاد يونس في برنامجها «صاحبة السعادة»، بحلقة خاصة بعنوان «أم البنات»، عن موقف طريف وغريب معها وابنتها إيمي سمير غانم بسبب كلب.
وتحدثت الفنانة الراحلة دلال عبد العزيز، عن علاقة ابنتها إيمي سمير غانم الوطيدة للكلاب، وعشقها لهم، «أول ما إيمي اتجوزت حسن الرداد، كانوا لسه بيوضبوا في شقتهم، وقاعدين عند مامته، وهي عندها كلاب، وحسن مش بيحبهم ولا مامته، سابت الكلاب ليا اهتم أنا بيهم، وركبت كاميرا عندنا في البيت وعلى الموبايل شايفانا علشان تراقبها».
وتابعت الفنانة دلال عبد العزيز: «كانت إيمي كل شوية تكلمني تقولي مامي أنت لسه مفتحتيش للكلاب ليه؟ أنت لسه مأكلتيش الكلاب، واتحججت بأنها قال إيه بتطمن على باباها بالكاميرا».
موقف غريب لدلال عبد العزيز: دفن كلب ووضع رخامة باسمه
وأكدت الفنانة دلال عبد العزيز التي غيبها الموت اليوم، أن حسن الرداد قابل تصرفات إيمي مع الكلاب بطريقة مضحكة، «لقيته جاي يقولي إيه اللي أنا اتجوزتها دي، دي مخابرات، أنا خايف تكون مراقباني أنا كمان».
ولم تكن دلال عبد العزيز تحب الكلاب أو تكرهها فهي فقط كانت تهتم بها باعتبارها أرواح بريئة، وهي مسئولة عنها، «في مرة جبنا لإيمي كلب صغير سمته برواني، ولما بقى عنده 14 سنة يعني عجوز مات، عملت مناحة في البيت، وبقيت تعيط، ولبست أسود وتقولي مامي هاتي حاجة أحطه فيه جبتلها كيس زبالة، لقيتها بتقولي مامي حرام عليكي براوني مش زبالة، وراحت جابت فوطة جديدة من الدولاب ولفته بيها ونزلت هي ودنيا وكنزة مرات أخويا، ولابسين أسود وشايلة الكلب في عياط ودفنته، وجابتله رخامة وكتبت اسمه عليه، وبتروح تزوره وتدي عسكري الأمن في المكان بقشيش علشان ياخد باله منه».