«من حق الكلاب والقطط تدَّفى».. ملابس أنيقة من الصوف بالشتاء المتناغمة، المتماشية مع أجواء الاحتفالات بالكريسماس وأعياد الميلاد، من تصميم الرسامة «هبة شهيب» التي قررت منح الحيوانات الدفء في ليالي الشتاء الباردة.
«هبة» صاحبة الـ50 عاماً، تروي تفاصيل براند «شاشيتا» لملابس القطط والكلاب لـ«»: «الفكرة بدأت معايا في فترة كورونا لما قعدنا وقت الحظر في البيت، كنت بتسلى وعملت للكلبة بتاعتي بلوفر من الكروشيه، مكنتش متخيلة إنه هيعجب الناس كده، وعملت منه هدايا لصحابي لحد ما اقترحوا عليّا أنزل صور الملابس في جروب على فيس بوك، وكانت الطلبات كتيرة لحد ما عملت براند لملابس القطط والكلاب».
هبة: اتعلمت على يوتيوب
«هبة» خريجة فنون جميلة قسم ديكور، وتعشق الرسم، لكنها لم تكن على دراية كافية بفن الكروشيه، فكانت والدتها تعلمها فى البداية طريقة «التريكو»: «اكتشفت أن الكروشيه أسهل وبيعمل غرز أحلى فاتعلمت على يوتيوب، وكنت مستغربة الناس في الأول إزاي بيعملوا الكروشيه بس فضلت أحاول لحد ما اتعلمت».
بعد محاولات التعلم أنشأت هبة «شوب أونلاين» على موقع تبادل الصور والفيديوهات «إنستجرام»، حينما زادت الطلبات على الملابس، ولم تقتصر على تنفيذ الملابس للكلاب فقط فكان للقطط نصيب أيضاً.
كروشيه للكلاب والقطط
«اكتشفت أن الكلاب فعلاً بتحس بالبرد زينا، ولما كلبتي ولدت عملت للكلاب الصغيرة ملابس، وحبوها ومضايقوش منها»، بحسب «هبة».
مع الوقت أخذت «هبة» تطور أفكار المنتجات، فلم تكتفِ بالملابس فقط، واتجهت لتصميم «الجواكت» و«شنط الكلاب»، بالإضافة لـ«فيست» يناسب الكلاب بمختلف الأحجام: «عملت كمان حاجة زي الجزم للكلبة بتاعتي، عشان وقت كورونا كنت خايفة تنقل الفيروس في رجليها، كمان الجزم دي بتكون حل مريح في الشتا ووقت المطر».
الملابس الكروشيه تكون في الشتاء، وبحلول الصيف تستبدل «هبة» الصوف بالقطن، وتحيك «بندانات» للقطط كنوع من الزينة.