قبل حلول المساء وبينما كان عصام الهواري، صاحب محل في الطوابق بفيصل يتابع أعماله، شاهد طفلة صغيرة لم يتجاوز عمرها 5 سنوات، تشير إلى سائق توك توك وهي تبكي وتقول له: «عايزة بابا وماما»، اقترب منها وسألها عن اسمها وعنوانها وقرر أن يصطحبها للبحث عن أهلها.
موقف عصيب تعرض له «الهواري»، البالغ من العمر 37 عاما، جعله لا يتردد لحظة في إنقاذ الطفلة من التشرد والضياع ومساعدتها على الوصول لأهلها: «عندي محل في شارع فيصل وكنت قاعد قدامه، ولقيت طفلة بتعيط وتقول عايزة بابا وماما، أخدتها وركبنا التوك توك، ودورنا كتير على أهلها، ولما معرفتش أوصل لهم أخدت الطفلة معايا البيت».
رحلة البحث عن أهل الطفلة
واصل «الهواري» رحلة بحثه عن أهل الطفلة لكن بطريقة مختلفة: «دخلت على الفيس بوك وكتبت منشورات كتير، وقلت لنفسي لو موصلتش لأهلها مش هسيبها وهربيها لوجه الله، أنا عندي 3 أولاد ومعنديش بنات، وكنت هعتبرها بنتي».
يحكى عصام الهواري تفاصيل العثور على أهل الطفلة في أقل من 7 ساعات، قائلا: «البنت قعدت عندى من 6 المغرب للساعة 1 ونص بالليل، وبعدين عرفت إن والدة الطفلة منفصلة عن والدها، ووالدها شغال خارج القاهرة، والطفلة عايشة مع جدتها لوالدتها في منطقة الطوابق بفيصل، وجارهم جالي وقالي الطفلة كانت تايهة، رفضت أسلمها له، إلا بعد ما والدتها كلمتني وبعتتلي حد بصورة شهادة ميلادها وصورة بطاقة الوالدين، عشان أتاكد إنهم أهل البنت وسلمت البنت لجدتها».
الإهمال.. سبب ضياع الطفلة
يرى «الهواري» أن الإهمال سبب ضياع الطفلة: «جار الجدة خد الطفلة عشان يفسحها مع بناته، لكن للأسف مخدش باله منها وتاهت، محدش هياخد باله على عياله غير الشخص نفسه، البنت سابت من إيده وتاهت».