دراستها بكلية التجارة في جامعة عين شمس، لم تنسها يوما مواهبها المختلفة في الفن والطهي، إذ أنها تمتلك قدرة على الابتكار والمحاكاة بصورة مميزة للغاية، جذبت الجميع إليها، لتظهر موهبتها بالحفلات وأعياد الميلاد، وهو ما أهلها لإطلاق مشروعها الصغير Cupcake Dina، الذي يلقى إعجابا واسعا.
دينا سامي فخري، خريجة كلية تجارة وصاحبة مشروع Cupcake Dina، تروي لـ«»، بداية فكرتها: «بحب الرسم وبحب أعمل حلويات وبحب جدا أجرب أعمل حاجات جديدة، بدأت في الأول أعمل كيك أعياد ميلاد أولادي والكل انبهر لدرجة محدش كان مصدق أني أنا اللي عاملاهم وبعدها بدأ المقربين مني يشجعوني أكمل وأعمل المشروع ده وفعلا عملته وبدأت بأعياد ميلاد أصحاب أولادي وقرايبي والموضوع بدأ يكبر سنة بعد سنة».
دينا سامي تبدأ مشروعها بأدوات بسيطة
استخدمت «دينا» في بداية مشروعها أدوات بسيطة للاعتماد عليها في الحلوى: «ابتديت أتعلم حاجات كتير من اليوتيوب وعملت مشروعي بأدوات وخامات بسيطة وكنت كل شوية أجيب أدوات جديدة تساعدني أكتر، وفي شيف كبير شاف شغلي وقالي شغلك حلو بس لازم أجيب عجان كبير عشان الكيك يبقى أفضل وأجيب فرن بمروحة عشان الخبيز يبقى أفضل وأجود وعملت بنصيحته اللي فرقت جدا في شغلي وجودته».
قالب الكيك يستغرق من يومين إلى أسبوع
تستغرق «دينا» من يومين إلى أسبوع لإعداد قالب الكيك وفقا للشكل المطلوب: «على حسب الشكل بيتحدد وقت إنجازي لقالب الكيك عشان المجسمات بتكون محتاجة دقة شديدة ووقت كبير، بعمل الأشكال الأول وبعدين بخبز الكيك وبعدين بعمل الكريمة والحشوات آخر حاجة عشان تبقى فريش وأهم حاجة عندي أن الطعم يكون حلو أوي ومختلف زي الشكل».
ست سنوات هي عمر مشروع «دينا» الذي تتمنى أن يكبر وتصبح مالكة لمحل حلوى خصيصا لها: «بحلم يبقى عندي محل كبير أو أشتغل في فندق كبير ويبقى عندي إمكانيات أكبر وخامات أكتر وكمان نفسي أسافر برة وأخد كورسات كتير عشان أبقى أفضل وأطور من نفسي».